Bakit ang Bilis Mo Sumuko sa Atin?

Bakit ang Bilis Mo Sumuko sa Atin?

Paulit-ulit na tanong sa aking sarili

Na sa labis na gasgas ay tila kabisa na

Ng apat na dingding ng aking silid

Kaya kanyang hinuhuni pabalik ang bawat titik

Bakit ang Bilis Mo Sumuko sa Atin?

Minsan ako’y nagmuni-muni

Kasama ang mga munti kong kasiping

Init ng kape na mas tumagal pa sa relasyon natin

Usok ng yosi na mas malinaw pa sa iyong mga “dahil”

Mabuti pa ang manika, kapag ang galaw ay humina

Bibili lang ng baterya, ay muling iindak sa musika

Mabuti pa ang bala ng gameboy, kapag nagsimulang magloko

Ihip na hindi nahahapo, masilayan lang si Mario

Mabuti pa ang lapis, kapag ang sulat ay di na mawari

Tasahan lang ng kaunti, ang anyo’y tila sandata ulit

Ngunit tayo, ngunit tayo, ngunit tayo

Bakit ang Bilis Mo Sumuko sa Atin?

Saang parte ng halik ko ang lasa ay tila pumait?

Gawa ba ito ng mga nasambit ko nung away natin?

Saang parte ng yakap ko ang pasa ay kumapit?

Gawa ba ito ng pagtulak ko noong ako’y iyong pinilit?

O baka naman may nagkulang sa “Mahal Kita”?

Marahil sa tono, bigkas o kung ano man?

Ikaw ay sumagot, ikaw ay sumagot

Pakiusap, dugtungan mo ang soliloquy ko

Pero oo nga pala, aking nakakalimutan

Naglaho ka na bago pa kita lingunin at makausap

Kaya ngayon, akin na lang hahayaan

Sa aking isipan ay itatanim na lang

Na kunwari, ako ay isang hamak na estudyante

Na sa aking pagsusulit ay nangangamote

Bakit ang Bilis Mo Sumuko sa Atin?

Bakit ang Bilis Mo Sumuko sa Atin?

Bakit ang Bilis Mo Sumuko sa Atin?

Tangina Bakit ang Bilis Mo Sumuko sa Atin?

Ipinasa ko na ang aking papel..
 

Malinis, blanko, puro espasyo, walang sagot

Pero mas mabuti na siguro ang ganoon

Na sa halip na pilit isipin ay kusa na kong sumuko

Kaysa naman mapag-iwanan ako ng panahon

At lisanin ng mga kumakalabit na pagkakataon